E Te arotake whaiaro i ngā Kura Kaupapa Māori Te Aho Matua

Ko te whakapakari i te āheinga ki te arotake whaiaro i roto i te mātauranga taketake - pērā i ngā kura Te Aho Matua – tētahi āhuatanga matua, ā, koia nei tētahi tino kaupapa arotahi a te Tari Arotake Mātauranga. Nō te tau 2000 te Tari Arotake Mātauranga i hora ai i ētahi pātai matua hei whakaoho i ngā matapaki aromātai. Nō te tau 2008, ka whakaae te Tari Arotake Mātauranga ki te whanaketanga o te aromātai whaiaro i roto i ngā kura kaupapa Māori, i ngā whakaritenga ā Te Tāhuhu o Te Mātauranga mō te whakamahere me te pūrongo, me te hiahia hoki mō tētahi mahere aromātai ā te Tari Arotake Mātauranga. I reira ka tahuri te Tari Arotake Mātauranga ki te whakawhanake i tētahi mahere aromātai kotahi hei whakatutuki i ngā herenga katoa.

Mai i taua wā, ka āta kitea te whānuitanga o ngā tūmomo whakatinanatanga o te arotake whaiaro. Kei tōna iho ētahi mātāpono matua ka noho hei pou mō te āhua o te arotake whaiaro mō ngā kura Te Aho Matua me ō rātou whānau. He whai wāhitanga tēnei huānga o te arotake mō te Tari Arotake Mātauranga, hei whakaemi, hei pūrongo hoki i ngā mōhiohio e pā ana ki te arotake whaiaro, mō te painga o te katoa o ngā kura kaupapa Māori whānui.

E hiahia ana te Tari Arotake Mātauranga kia hāngai tana titiro ki ngā huarahi e whakamahia ai te arotake whaiaro e ngā whānau o te kura, hei āwhina i ā rātou whakatau inā arotahi rātou ki ngā putanga kounga tiketike mō ngā ākonga. He mea nui kia āta tirohia ngā rerekētanga o ngā mātāpono matua, me pēhea hoki te whānau e tae ake ki ā rātou whakatau mā te arotake whaiaro. He mea nui hoki ki te whai whakaaro ki ngā tūmomo rerekētanga ā-tangata, ā-ahurea.

E wātea ana ki te Tari Arotake Mātauranga me Te Rūnanga Nui o Ngā Kura Kaupapa Māori o Aotearoa te tini o ngā mōhiotanga whai take mō te tukanga me ngā mahinga arotake whaiaro i ngā kura Te Aho Matua, ā, ka tohu hoki tēnei i te whānuitanga me te hōhonutanga o te tukanga me ngā whakaritenga arotake whaiaro, puta noa i te motu. Ka tāutu anō hoki pea i ngā whakaritenga matua me ngā tino rerekētanga ā te Māori, hei mōhiohio anō mā te Māori.