I Te Tauākī Whakapūmau a te Whānau

Ko tētahi wāhanga matua o te tukanga arotake ko te whakatutuki i ngā herenga ā-ture, ā-tikanga hoki (tae atu ki ngā Aratohu Mātauranga ā-Motu me ngā Aratohu Whakahaere Mātauranga ā-Motu), mā ngā kawenga, ngā herenga hoki i whakatakotohia ai ki te tūtohinga o te kura. Mā te noho ngātahi, koia nei ngā herenga tautukunga matua mō ngā kura kaupapa Māori o Te Aho Matua.

Kua whakawhanakehia e te Tari Arotake Mātauranga tētahi Tauākī Whakapūmau ā te Whānau, hei whakamahinga ki ngā arotake i ngā kura. Ka whakatakotohia, ka whakamāramahia hoki ki tēnei tuhinga ngā herenga ā-ture e whai pānga ana ki ngā kura Te Aho Matua.

Kua waihangatia te Tauākī Whakapūmau a te Whānau hei āwhina i ngā kura ki te whakahaere i ā rātou herenga tautukunga. Ka whakamāramahia ki taua tuhinga ngā tikanga ā tēnā me tēnā, i roto i te anga ā-ture, ā-whakaritenga hoki, ā, ka tonoa hoki kia whakamanahia e te heamana o te whānau, e te tumuaki hoki te whakatutukitanga o te kura i aua herenga. Ka whakaū te whānau āe, kua tutuki i a rātou ngā ture, kāore rānei i tutuki, kāore i te tino mōhio rānei mēnā kua tutuki.

Hei āhuatanga tonu o te tukanga, ka āta arowhai te Tari Arotake Mātauranga i te maha o ngā tikanga herenga ā-ture matua (ka kīia ēnei i ētahi wā ko ngā mea nunui e rima  1  kia tino mōhio ai kua tutuki te Tauākī Whakapūmau a te Whānau me te tōtika anō o te whakaoti.

Mēnā ka kitea nā te Tauākī Whakapūmau a te Whānau, nā te arowhai a te Tari Arotake Mātauranga, nā te tukanga arotake whānui rānei ētahi take matua e whai pānga ana ki ngā herenga ā-ture, ka whakahāngai anōtia pea te arotake, kia aro pū ai ngā tikanga herenga ā-ture hei whakatutuki.

Ahakoa te tikanga ia kia whakaotingia te Tauākī Whakapūmau a te Whānau i mua tata tonu i te arotake a te Tari Arotake Mātauranga, ko tāna waihanga hei arowhai i ngā herenga ā-ture e mea ana, ka taea e te whānau taua tuhinga te whakamahi i ētahi āta wā e hiahiatia ana, hei whakapakari ake i tā rātou arotake o roto mō ngā āhuatanga hei whakatutuki (ehara mā te whakariterite anake mō te taenga mai o te Tari Arotake Mātauranga).