Te Rākeitanga – Te Aromātai Whakawhānui

Ko Te Rākeitanga – Te Aromātai Whakawhānui te tino kahupapa mō ngā aromātai katoa ā te Tari Arotake Mātauranga. Ka whakahāngaitia ngā rārangi tikanga mō Te Pupuketanga me Te Manakotanga i runga anō i tēnā e hiahiatia ana, me te mea ka whai hua ake mō ia kura.

He tino aronga ki te arotake whaiaro me ngā mōhiohio mai i te kura me tōna whānau, e āhei ai te Tari Arotake Mātauranga ki te aromātai me te pūrongo mā tētahi huarahi ka wāhi hua tonu ki te kura.

Ngā paearu e pā ana ki te whakariterite i Te Rākeitanga – Te Aromātai Whakawhānui

Ka taka te nuinga o ngā kura ki tēnei momo aromātai. Ka whakaritea ngā arotake Te Rākeitanga mō ia toru tau, whai muri i te arotake o mua.

Ka kitea te pai o te āhua mahi, me ētahi o ngā āhuatanga hoki e tohu ana i te kounga kairangi, ā, kāhore he āwangawanga i kitea ai e te Tari Arotake Mātauranga i roto i te mātauranga me te haumaru o ngā ākonga.

Hoahoa-10-Nga-paearu-ki-te-whakariterite-i-Te-Rakeitanga.JPG

Hoahoa10: Ngā paearu ki te whakariterite i Te Rākeitanga – Te Aromātai Whakawhānui

Ka whakahaeretia Te Rākeitanga – Te Aromātai Whakawhānui e toru tau i muri i te arotake o mua. Ko te tikanga ka whakapakari tēnei i ngā whakaritenga i te kura i taua wā, ā, ka akiaki anō hoki i te whānau o te kura Te Aho Matua ki te whakawhānui ake i ā rātou whakaritenga mā te aro mārika ki te haere tonu i ngā whakapaitanga.

Kua whakahāngaitia ake te tukanga arotake kia kaha ake ai te arotahi, hei whakatairanga i te arotake whaiaro, ā, kia āhei ai hoki ngā kura ki te whakakaha ake i te aronga me te whai huatanga o te whakamahi i te tukanga aromātai ā-waho a te Tari Arotake Mātauranga, mā te pai o ngā whakaritenga aromātai me ngā tauira aromātai hoki.

Ko tā Te Rākeitanga:

  • he whai kia pūmau tonu ai ki te tūturutanga o te anga taketake, a Te Aho Matua
  • he tautoko i te arotake whaiaro a te kura, mā te aromātai ā-waho
  • he whai kia whakawhānuitia te āheinga o ngā hapori ā-kura ki te aromātai
  • he whakanui ake o te arotahi ki Te Aho Matua
  • he whakaōkawa i te whakaae e whai pānga ana ki te āheinga o te Tari Arotake Mātauranga ki te whakamahi i ngā whakaaturanga i whakaratohia ai e te whānau, ā, me ērā whakaaturanga anō hoki i ahu mai i ētahi atu huarahi, pērā i ngā tirohanga akomanga, puta noa i te whānuitanga o ngā tūmomo akomanga
  • he whakaemi i ētahi atu mōhiohio hei hāpai i te whakawhanaketanga o ngā kura kaupapa Māori Te Aho Matua, puta noa i te motu.

Ka arotahi Te Rākeitanga ki ētahi tino āhuatanga i tāutuhia ai e te whānau o te kura. Ko te tukanga aromātai me te ara whakatewhatewha e hāpai ana I te Tari Arotake Mātauranga ki te āta ruku hōhonu mā te arotahi.

I te wāhanga whakamutunga o te arotake ka arataki te Tari Arotake Mātauranga i ngā matapaki aromātai me te whānau o te kura. I aua whakawhitinga kōrero, ka whakatōpū ngā mahi tātari, ngā mahi kōtuitanga hoki ā te Tari Arotake Mātauranga, kia riro i te whānau te kiko e tika ana, ā, e whai pānga ana ki ngā putanga a ā rātou ākonga, me ā rātou ake whai wāhitanga ki te tukanga.

Mā ēnei mahi matapaki ka puta he pūrongo i āta tuhia, ka whakamanahia hoki, ā, nā tēnei ka puta ake te tirohanga whānui puta noa i ngā wāhanga matua e toru – te arotahi o te aromātai, te arotake whaiaro, me te Tauākī Whakapūmau a te Whānau.

Te tukanga arotake

Ko ngā mema o te rōpū arotake, ko ngā āpiha arotake me ngā kaitiaki, ā, ka whāia e rātou ngā wāhanga o te tukanga arotake.

Te āhua o te Arotake o Te Rākeitanga

Hoahoa-11-Te-tukanga-arotake-mo-Te-Rakeitanga.JPG

Hoahoa 11: Te tukanga arotake mō Te Rākeitanga – Te Aromātai Whakawhānui