Te Pupuketanga – Te Aromātai Whakawhanaketanga

Ngā paearu e pā ana ki te whakariterite i Te Pupuketanga – Te Aromātai Whakawhanaketanga

Mā te Tari Arotake Mātauranga e whakatau mēnā ka whakahaeretia he arotake anō i roto i te kotahi ki te rua tau, inā ka kitea e te Tari Arotake Mātauranga ētahi āwangawanga e whai pānga ana ki te mātauranga me te haumaru o ngā ākonga.

Hoahoa 12: Ngā paearu e pā ana ki te whakariterite i Te Pupuketanga – Te Aromātai Whakawhanaketanga

I tua atu i tērā ka hoki anō te Tari Arotake Mātauranga i roto i te kotahi ki te rua o ngā tau, inā – ki tā te Tari Arotake Mātauranga titiro – me uru mai ngā wawaotanga o waho, mā te taumata o te manatū, iti ake rānei, kia tutuki ai ngā whakapaitanga e hiahiatia ana.

Mehemea i te tū kē i te wā o te arotake, tētahi Kaiwhakahaere Manatū ā-wā, tētahi kaikōmihana, tētahi atu tūmomo wawaotanga rānei a te Tāhuhu o te Mātauranga, mehemea rānei e taunakitia ana tētahi o aua whakaritenga whai muri i te arotake, ka whakaritea te wā o te arotake mā te whakawhiti whakaaro anō hoki ki te Kaiwhakahaere ā-Motu o ngā Ratonga Arotake ā te Tari Arotake Mātauranga.

Kua waihangatia Te Pupuketanga – Te Aromātai Whakawhanaketanga hei whakamana i ngā whānau o ngā kura Te Aho Matua (tae atu ki ngā kaimahi, ki te poari me ngā kaihautū) me te arotahi ki te whakapikinga ake puta noa i ngā kaupapa matua i tāutuhia ai.

Heoi anō, ko te arotahi he whakapiki i te rangatiratanga o te kaupapa, ki te whakapakari anō hoki i te āheinga ki te whakaaro rautaki, te whakamahere me te kōkiri kaupapa, me te arotake whaiaro.

E mahi tahi ana hoki te Rūnanga Nui o Ngā Kura Kaupapa Māori o Aotearoa me te Tāhuhu o Te Mātauranga ki te Tari Arotake Mātauranga me ngā whānau o ngā kura, puta noa i Te Pupuketanga – Te Aromātai Whakawhanaketanga.

Ko tētahi atu āhuatanga o te hoahoa o te aromātai mō te kotahi ki te rua o ngā tau, ko tētahi anga whanaketanga taketake, i āta tāutuhia hei aro matua ki ngā tūmomo wāhanga o te ahunga whakamua. E whakamana ana ēnei i ngā kura Te Aho Matua, ā, ka hāngai nui ki te aronga e whakamahia ana i tēnei wā e Te Rūnanga Nui o Ngā Kura Kaupapa Māori o Aotearoa ki te hāpai i ngā whānau o ngā kura i roto i ā rātou mahi.

E toru ngā whenu i roto i tēnei anga:

• Whenu 1 Mārama – ka arotahi ki te whakapakari i te māramatanga ngātahi, kia tau ai te whakaaetanga, te whakaraupapatanga o ngā kaupapa matua, me te whakamahere
• Whenu 2 Pono – ka hāngai ki te whanaketanga, kua oti te ahunga te tautuhi, kua arotahi te whānau, ā, e ahu whakamua ana ki ngā whāinga mārama
• Whenu 3 Ūpoko Pakaru – kia kitea te ahunga whakamua, kia riro i ā rātou ngā pūkenga, ka pai ake hoki tō rātou tūnga ki te whakatutuki i ngā kawenga e pā ana ki te whakahaeretanga o tō rātou ake kura, ā, ka kaha anō hoki te pūmautanga o te wā roa.

Hoahoa 13: Te anga whakawhanaketanga taketake o Te Pupuketanga

Ko tā te arotahi ki ēnei whenu he whakapakari i te whānau o te kura me te whakapakari i a rātou ki te whakapūmau i ngā whakapaitanga i roto i te wā roa. Mā ēnei whenu hoki ka taea te ine te ahunga whakamua i a rātou e whakatau whakaritenga ana mō te ahu whakamua i roto i te tukanga whakawhanaketanga o te kotahi ki te rua o ngā tau. He waitohu kei ia whenu hei tautohu i ngā tohu i te huarahi. Mā ēnei waitohu ka āhei ai te Tari Arotake Mātauranga, Te Rūnanga Nui o Ngā Kura Kaupapa Māori o Aotearoa, me te whānau ki te whai wāhi atu ki ngā whakaritenga e hāngai ana ki te ahu whakamua.

Ngā Whenu me ngā Tohu Tukanga o Te Pupuketanga

Hoahoa 14: Ngā Tohu Tukanga o Te Pupuketanga

Puta noa i Te Pupuketanga, e toru ngā tino wāhanga o te tukanga arotake - Ko teWhanaungatanga, ko te Whakaaetanga, me te Whakataunga. Koia nei ngā wāhanga ōkawa o te tukanga (Tirohia te Hoahoa 12).

Hei hora ngātahi ēnei wāhanga tukanga – Te Whanaungatanga, Te Whakaaetanga me Te Whakataunga – me ngā whenu ahunga whakamua – Te Mārama, Te Pono me te Ūpoko Pakaru – i te tūāpapa o te māramatanga ki ngā mahi ka whāia tonuhia e te whānau o te kura. Mā tēnei huinga o ngā wāhanga tukanga me ngā whenu ahu whakamua, e kīia nei He Whāriki Paihere, ā, ka whakapakari i te whānuitanga o te tukanga mā te whānau o te kura, me te Tari Arotake Mātauranga.

Hoahoa 15: He Whāriki Paihere – te tukanga me te ahunga whakamua

Te āhua o te Arotake o Te Pupuketanga

Hoahoa 16: Te tukanga arotake mō Te Pupuketanga - Te Aromātai Whakawhanaketanga