Ngā mahi whai muri

E taunaki ana te Tari Arotake Mātauranga, kia tahuri

Ngā poari whakahaere

  • ki te āta whakarite i ō rātou māramatanga ki ngā tikanga e pā ana ki Te Marautanga o Aotearoa me Ngā Whanaketanga Rumaki Māori, tae atu ki ngā rauemi me te tautoko e hiahiatia ana hei whakawhanake tonu i te marautanga ā-kura, me te whakatakoto i ngā whāinga, te pūrongo hoki i runga i ngā whanaketanga
  • i ngā kura auraki me ngā kura e whakamahi ana i Te Marautanga o Aotearoa me te New Zealand Curriculum, ki te āta whakarite i te whakanuitanga me te whakapūmautanga a ngā kaiārahi o te kura, i te noho pūmau o te New Zealand Curriculum me Te Marautanga o Aotearoa, me Ngā Whanaketanga Rumaki Māori, ngā National Standards hoki, i roto i te reo matatini me te pāngarau.

Te Tāhuhu o te Mātauranga

  • ki te whakarato i te whānuitanga ake o te ārahi me te tautoko mō ngā kura auraki e whakamahi ana i Te Marautanga o Aotearoa ki ngā akomanga reo rua, rumaki reo Māori hoki, me ngā take e whai pānga atu ana ki te whakamahinga o Ngā Whanaketanga Rumaki Māori
  • ki te ū ki te hāpai tonu i ngā kaiako ki te whakamahi i Ngā Whanaketanga Rumaki Māori, me te whakarite i ngā poari me ngā whānau ki te whakatakoto i ngā whāinga i runga i ngā whanaketanga, ki ā rātou tūtohinga ki ngā kura me ngā kura auraki, hei te tau 2012
  • ki te tahuri tonu ki te Rūnanga Nui o Ngā Kura Kaupapa Māori o Aotearoa, mō te whakawhanaketanga o te marautanga Te Aho Matua me ngā tūmanako e hāngai ana ki Te Marautanga o Aotearoa me Ngā Whanaketanga Rumaki Māori.

Hei wāhanga tonu o āna arotake i ngā kura me ngā kura auraki hei te tau 2012, ka whakatewhatewha tonu te Tari Arotake Mātauranga i te ahunga whakamua ki te whakatinana i Te Marautanga o Aotearoa, me te whakamahi i Ngā Whanaketanga Rumaki Māori.